Góðir farþegar, vinsamlegast gangið um borð!

Jæja, miklum áfanga náð í gær.  Farþegaréttindin staðfest og stimpluð í flugskírteinið mitt.  Þetta þýðir semsagt að ég má núna formlega fljúga með farþega um loftin blá.  Fáum dettur líklega í hug að fara upp í flugvél með mér, tja í það minnsta fyrst um sinn, en ég get lofað ykkur að vandað hefur verið til verks.  Ég hef núna að baki yfir 70 tíma flugreynslu sem er ansi gott miðað við flesta sem taka sín farþegaréttindi.  Þetta kann vissulega að hljóma illa, enda hefði einhver sagt mér að hann væri frábær lögfræðingur af því að hann hefði tekið 8 ár í að klára fjögurra ára námið, hefðu runnið á mig tvær grímur.  Vona að lesendur mínir viti betur, jafnvel þó það væri bara gert af aumkun :)  Annars er þetta ágætt fyrir flóru adrenalínsjúkra enda hér komin kærkomin viðbót við teygjustökk, fallhlífastökk, flúðasiglingar o.fl.  Semsagt; "Flug með Frosta". 

Eva, betri helmingur minn, á 18 ára tvíburabræður sem eru skondin eintök. Þeir eru ofsalega líkir þótt að blessunarlega sé það að  breytast hægt og rólega. En ég kynntist þeim fyrst þegar þeir voru á leikskólaaldri og allt frá þeim degi hafa þeir verið sem ein sál þegar kemur að því að upplifa hluti.  Tómas gat t.d. ekki horft á flugelda út um gluggann um áramót nema að kalla á Stefán bróður sinn til að upplifa útsýnið.  Og öfugt.  Svona dálítið eins og gin og tónik.  Og þetta hef ég verið að upplifa á flugi undanfarið.  Ég get huggað mig við að heyrnartólin í flugvélinni leyfa mér að heyra blaðrið í sjálfum mér og þannig get ég leikið ótrúlegustu karaktera einn og með sjálfum mér.  Og sungið!  Þetta er svolítið farið að líta út eins og eintak á geðdeild þegar maður er farinn að leika Anton flugstjóra og aðstoðarflugmann hans (sem svo eftirminnilega var leikinn af Sigga Sigurjóns).

Annars eru þónokkrir á listanum sem vilja fá að fara rúnt og því held ég að ég verði ekkert í vandræðum með félagsskap.  Ísland er fallegt en ennþá fallegra úr lofti.  Hlakka til að upplifa það með ykkur.  Ég lofa ykkur samt að ég mun ekki syngja!

Athugasemdir

[Mummi senior (IP-tala skráð) 13.8.2008 kl. 15:36]

Til hamingju Frosti !! Sko. Eru ekki örugglega handföng og önnur traustvekjandi traustvakar fyrir farþegana?Þú veist manna best að þegar ég ek með þér þá nota ég allar öryggishöldur bifreiðarinnar bæði sjálfrátt og ósjálfrátt.Mikið.Oft.Þá er spurning um að staðsetja svona glaðloftskút og grímu farþegameginn...Úff hvað það væri gaman að skella sér með þér.EN. Ég finn til handkulda strax-bara við tilhugsunina.Sjáum til.

Til hamingju aftur! 

[Rakel Guðmundsdóttir (IP-tala skráð) 14.8.2008 kl. 10:26]

Til hamingju með farþegaréttindin! :) Ég skal sko koma með þér næsta sumar, ekki spurning....en væri ágætt samt að taka hugmyndina um glaðloftið til athugunar haha.

[Bóbó von Volga (IP-tala skráð) 14.8.2008 kl. 14:21]

... uuu nei Rakel, það gerir þú ekki ! Með fullri virðingu fyrir Antoni Skúlasyni flugstjóra.